ازاي تشتري طابعة؟

الخطوة الأولى هي إنك تحدد إحتياجاتك:

• عايز مجرد طابعة علشان لو اتزنقت في أي حاجة أطبعها بدل ما أقعد أدور على حد أطبع عنده

• عايز أطبع كتب علشان مابحبش أقرا PDF وفي نفس الوقت الكتب غالية أو مش لاقيها أصلاً

• عايز يبقى عندي أكتر من نسخة من ورق مهم بحتاجه أو بحتاج أوزعه على الطلبة بتوعي أو زمايلي في الشغل

• عايز أحول كتب أو ورق كتير لنسخ إلكترونية علشان أحافظ عليها

الخطوة التانية هي إنك تحدد متطلباتك:

• لو محتاج طابعة علشان تطبع كتابة بس، يبقى إنت كدة محتاج تشتري طابعة أبيض وأسود

• لو محتاج طابعة تطبع صور أو أبحاث فيها صور يبقى إنت كدة محتاج تشتري طابعة ألوان

• لو محتاج تنسخ كتير يبقى إنت محتاج تشتري طابعة متعددة الوظائف أبيض واسود أو ألوان فيها ماكينة تصوير

• لو محتاج تحول ورقك لنسخ إلكترونية يبقى إنت كدة هتشتري طابعة متعددة الوظائف ألوان أو أبيض وأسود فيها ناسخ -اسكانر-

الطابعات عموماً بكل أشكالهم متقسمة نوعين أساسيين؛ طابعة ليزر جت وطابعة إنك جت. كل نوع له مميزاته وخصائصه:

الطابعات الليزر جت:

• الطابعة الليزر جت تكلفة الطباعة فيها أرخص سعر من الطابعة الإنك جت لأنها بتطبع كمية ورق كتيرة مقارنة بالطابعة الإنك جت فهي إختيارك الأمثل لو بتحتاج تطبع كتير

• الطابعة الليزر رغم إنها موفرة في الطباعة إلا إن أحبار الليزر غالية مقارنةً بأحبار الإنك لأنها بتطبع كمية أكبر زي ما وضحنا. بالتالي لو إنت بتطبع قليل وحابب تجيب ليزر علشان توفر في الطباعة فإنت حاسبها غلط.

• الطابعة الليزر بتطبع أسرع علشان كدة هي عملية والأنسب دايماً للمكاتب أو الأشخاص اللي بيحتاجوا يطبعوا يطبعوا بشكل عملي. كمان الطابعة الليزر بتطبع بجودة عالية جداً بالنسبة للكتابة والرسوم البيانية أو خرائط. إنما جودة الطابعات الإنك أفضل كتير في طباعة الصور.

  
  

الطابعات الإنك جت:

• الطابعات الإنك جت عموماً أرخص من الليزر، لكن تكلفة الطباعة بتكون أغلى من الليزر.

• الطابعة الإنك جت هي الأفضل بالنسبة لنقاء الصور الملونة

• الطابعة الإنك جت حجمها أصغر مقارنة بالطابعات الليزر

مراعاة توافر وتكلفة الأحبار:

بعد ما تحدد نوع الطابعة إذا كانت ليزر أو إنك جت. دلوقتي لازم تعرف موديل خرطوشة الحبر اللي بتشتغل معاها وهل هي متوفرة ولا لأ وإيه هي سعرها وبتطبع كام ورقة.